رضينا بالهم ولكن

( منال ) بنت طيبه القلب ... ابوها رجل بسيط يعمل اسكافى اى تصليح الاحذيه القديمه وهى مهنة ارزاق بسيطة ... ويوم فيه ويوم مفيش ... ولكن الأرزاق بالله وعايشين .... ومنال هى اكبر اخواتها الاولاد والبنات.... العمر بيجرى .. اصبح الوقت حرج بلغت من العمر 29 سنه والقطار سريع لا يرحم .... قطار الوقت لا يتوقف ... وامها البسيطه تنظر اليها وتقول ... شكلك حلو ... قوامك حلو ... لسانك حلو .... لكن فين شباب اليوم ... امتى افرح بيكى يا بنتى ؟ وتبكى الام الوديعه ... ولكن البنت يرتسم على وجهها تكشيرة الحزن وهى تقول الفرج من عند ربنا يا أمى وتضرب الام كفا على كف وتقول ... امتى هايجى الفرج ؟! يظهر ان ربنا ناسينا ... إرحمنا يارب ومتاخدش ذنبنا فى بناتنا ... وتحاول منال ان تخرج امها من عبوسه الموقف وتقول قولى ياامى فين سوق العرسان وانا اروح اشترى عريس وذات يوم جاءت ام يوسف الجارى الطيبه التى تسكن فى اول الشارع وهمست فى اذن ام منال وتقول ابن الحلال عاوز منال .... فين هو ؟ ... ليه مجاش وصمتت ام منال ثم تكلمت عمره كام ..؟ 35 سنه مناسب ... امتى يجى ..؟ يوم الخميس الساع 7 .... وانتظرت منال عريسها وفى شوق وهى على احر من الجمر .... وصباح يوم الخميس ذهبت منال الى بنت خالتها التى تعمل كوافيرة فى شبرا لكى تتهندم للعريس المرتقب ... وفى مساء يوم الخميس حضر العريس وكانت المفجأه ....ــــ انه يستند على عكازين ..... ولكن ام يوسف لم تقل لنا هذا الامر ...ما هذا هل هو اصيب فى حادث ...؟ ام ..... اجابت ام يوسف انه من طفولته مصاب بشلل اطفال .اصيبت منال بخيه امل .. اصوم اصوم وافطر على !!!!! هو ده اخر صبرى .....والام فى بؤس قالت لبنتها شوفى يابنتى فيه بعدك ثلاث بنات لازم تتجوزيه علشان توسعى لاخواتك البنات .... ضربت منال على صدرها .... آخد واحد مشلول بيمشى على عكازين ... ليه ...؟ من قله الرجاله ...!قالت الام ... الراجل لا يعيبه اى شئ ... وفكرت منال بسرعه وقالت اتجوزة واخلص من عذاب الغسيل والمواعين والكنس و و و و ...... وارتاح ووافقت منال ... بعد تردد ... وامها وافقت على مضض ماذا تفعل هذا هو نصيبها ...وتحدد ميعاد الخطوبه ... وفى بساطه سمع الناس ان منال ستتم خطوبتها ... الكل فرح للمسكينه ... ولكن خطيبها مشلول .. . فبدأت هذه تتغمز وتلك تقول ليه رضيت بالمشلول ... وثالثه تقول يسترها وخلاص ... ورابعه تقول ....... اما منا فكان رايها مش مهم كلام الناس.... المهم ان العريس يجى ..... وحضر العريس لتقديم الشبكه وسط فرحة .... ودخل وهو يستند على العكازينولما حان وقت تلبيس الدبله اختل توازن العريس لانه اضطر ان يتخلى عن العكاز الذى يمسكه فى اليد اليمين ولما اختل توازنه سقط على الارض .... فهلع الناس .... الف الف سلامه للعريس وبدأوا ينفضون له ملابسه .... ومنال دموعها تتساقط وتقول ياارض انفتحى وابلعينى ... ولما سألها العريس لماذا تبكيم ؟ فقالت ليه من الفرحه .... وانقضت الليله على خير ... المهم .. اهى جوازة والسلام اخرج علشان اخواتى البنات واعيش خدامه لهذا العريس ... الهم...طالت فترة الخطوبه ... ومنال تحاول ان تقنع نفسها بان الزواج قسمه ونصيب ... ولكن بعد عام ونصف حضرت ام يوسف الجارة التى تسكن فى اول الشارع وتطلب ام منال وهمست فى اذنها وقالت لها ان العريس مش عاوز يكمل ....؟ ليه ؟ لان العروس لا تحمل مؤهل عال وهذا يؤثر على تربيه الاولاد ... سرى الخبر الى منال العروس التى استغربت انه يطالبنى بمؤهل عال وانا لم اطالبه بأى شئ ....حقيقى رضينا بالهم والهم مرضيش بينا .